اول بوست لازم يكون مميز !!!! مين قال ؟؟

احم احم بسم الله الرحمن الرحيم .... اقدم لكم نفسي اسمي ترابد طبعا مو الحقيقي وطبعا دا مو اسم اساسا مؤخوذ من العنوان بس ايش يهمكم الاسم مو مهم اهم شي المعدن والاخلاق وحب الوطن ..

ايش كمان اه .. فتحت البلوق عشان انا احب اتكلم بس ما انتبهت لدا الشي الا لمن صحباتي اصروا اني افتحه, قعدت افكر ليه هما كده مصرين ؟؟ يعني انا مثلا مرره ما اعرف اكتب .. باللغتين العربيه والانجليزيه الاتنين مضروبين .. عشان كده تلاحظو انو كتابتي كلام وليست كتابه حقيقه .. طيب قلت امكن عندي موهبه من جد .. طبعا بعد تفكير وتمحيص وتأمل اكتشفت انهم فتحوا لي البلوق عشان يتخلصو من ثرثرتي وحكاياتي .. اممممم طبعا انا اكتشفت دا الشي بس سويت نفسي عبيطة وما فهمت نيتهم .. لكن على العموم هما الخسرانين .. حكاياتي ومذكراتي غير عادية وفيها الكثير من الفائدة كما ستلاحظو مع مرور الزمن ..

طيب بما انها اسمها دايريز ودايريز تعني مذكرات ومذكرات تعني دايريز .. لازم احكيكم ايش الي بيحصل حاليا ..طبعا ما حكتب اني دحين قاعده اكتب في البلوق واشرب شاهي والاولاد بره في الصاله قاعدين يزعقو عشان البرازيل دخلت هدف على هولندا .. بالمناسبه ان شاء الله تفوز هولندا .. المباره دي مهي مهمه بالنسبه ليه ... بكرا الحماس ..حبايبي الالمان مع الارجنتين وانشاء الله المانيا تفوز .. كل الناس مع الارجنتين هذا ظلم وايش بها المانيا لعبهم مررره حلو صح ميسي فنان لكن كلوسا كمان ربنا يحفظو ومايكل بالك مسكين مصاب الله يشفيه !!!!! ايش دا انا سرحت .. نرجع للمهم .. الحمد لله يوم الربوع كان اخر يوم في دي السنه الجميله سنه رابعه طب .. كانت سنه مليئه بالمعلومات والنوم في المحاضرات خاصة الراديولوجي .. ما علينا الي فات مات وما نبى فضايح ..اختبرنا اوفثالمو واي ان اتي .. الاختبارين كانو حلوين مع انه الاي ان تي كان فيلو نداله من الدكاتره لكن برضو ما ابى افكر في الهباب الي هببته ابى افكر في الاجازه والصيف وكل الاشياء الي ابى اسويها في هذه العطلة الجميله ... طبعا ليس كل ما يتمناه المرء يدركه .. يوم الربوع في الليل وانا اخلد الى مضجعي ورأسي مليء بالاحلام بويك اند جميل وخرجات ودا الكلام فجأه اكتشفت اني ما سلمت ورقه حقة اكزامينايشن لازم كان تتسلم لقسم الاوفثالمو .. ياحبيبي.. يا حبيبي... وفرحة قلبي بنفسي وبعبقريتي .... طبعا عدا الويك اند بقلق وقاعده طول الوقت اتخيل ردة فعل الدكاتره .. واحد حيزعق ويقول ايش الاهمال دا يا دكتوره تسلمي الواجب بعد ما ينتهي الكورس !!!! وواحد حيقول برا يا دكتوره نحنا اعطيناكم فرصه اسبوعين كنت بتسوي فيها ايه يا دكتوره ؟؟؟؟ وواحد حيقول لا لا دا ما حيقول حيعطيني كف على طول .... الله يستر .. بكرا حروح القسم ونشوف الدراما الي حتحصل ... (( ما صدقت اتخلص من دي المستشفى لمدة تلاته شهور اهو مافي يومين من الاجازه الا وانا رايحتلهم تاني الله يستر ما يعاقبوني باشغال شاقه طول الصيف .. اطمنكم بكرا .. مع تحياتي ترابد.. اجازه سعيده ..
ملاحظه : هولندا فازت على البرازيل ياي (: يعني برا وعبال الارجنتين بكرا كمان والمانيا تاخد الكاس ... اعرف بسبب دي الملاحظه كتير ناس حتكرهني بس  لا تنسو نحنا  فري كنتري ...