الاجازه تكشف عن انيابها لكن ترابد وصديقاتها يقاتلن بكل ضراوه (:

ضريبة الاجازه ضريبه غالية الثمن , ممنوع تجلسي في البيت وترتاحي وتسوي الي تبغي ,  ممنوع يجلس وجهك بدون مكياج لأكثر من يوم , ممنوع تجلسي بالبجامه لاكثر من اربع ساعات لانك لازم حتخرجي  ,, عشان طبعا الحياة الاجتماعية بتنتقم مننا ,, ربوع وخميس ممنوع يكون في حفله او عزيمه وانت تجلسي في البيت , يرحم ايام زمان , كل سبت عندنا اختبار ومحد يقدر يجبرك على شي غير المزاكره ,, بس طبعا انت تجلسي في غرفتك تتفرجي جرايز اناتومي ولا هاوس والعائله المالكه تحسبك يا عيني بتزاكري ,,
اليوم كان عندنا تلاته مواضيع نقدمها قدام الكونسالتنت ,, هايبر وهايبو كاليميا وبان سايتو بينيا ,, طبعا تم توزيع المواضيع يوم الربوع بيني وبين صحباتي ,, وطبعا ترابد والزن حقها ,, ريما لاتنسي تقرأي , رهف لا تنسي تحضري , ياويلكم لو نسيتو , ما نبى نتفشل قدام الدكتور  , المهم النوع دا من الكلام ........... رجعت الربوع البيت والنية طاهره وعزيمه شديده على فتح عمي التاني ربنا يحفظه ويخلي ليا الويكيبيديا .. لكن لسوء الحظ كان في عشاء عائلي وزيارة وما ادري ايش المهم ما مداني اقرأ ...
الخميس تم تجديد النيه وخلاص يا ترابد يلا قومي واستهدي بالله و يلا بسم الله بدأنا .. اجتمعت العائله فجأه وبدأ نقاش حاد .. ما خلص الا الساعه تلاته الظهر ..... طبعا بعد نقاش حاد زي كده شربت بعده كاستين مويه , وانا الي ما اكمل كاسه عادة ,, استنفدت طاقتي ,, رحت قلت في بكرا الجمعه ربنا ييسر .. واتجهزت لحفله لأحد الاقرباء , الي استمرت الى الساعه الثالثه صباحا .. واحلى شي في الحفله انو محد يبى يقوم كله يسأل التاني متى رايح ,, شي بسيط عن الحفله البنات شغلو واكا واكا خمسه مرات وكل وحده عملت نفسها شكيرا وهاتك تحشيش ,, والله ما كنت رايحه بس مررره انبسطنا الحمد لله ..
الجمعه .. خطبه وصلاة  .. وترابد تقول لسه اليوم طويل يمديني اقرأ .. اتفرجت فلم جميل اسمه خريف نيويورك  , عن واحد رجال عمره 48 سنه يحب بنت عمرها 20 سنه .. في البدايه يحسسك الفلم انو علاقتهم مستحيله لكن المفاجأه انها مناسبه تماما لوضعهم .. المهم ما ابى احرق الفلم روحو شوفو, اذا تبو طبعا  .. وضاع الوقت في يمين ويساروفوق وتحت ,  وجات  الساعه الثانيه عشر من منتصف الليل , انتبهت اني مفروض اقرأ البانسايتو بينيا .............................................................. ونمت وما قريتها (:
بكل شجاعه رحت المستشفى وقلبي مطمن ولا كأنه حاجه ..
لمن دخلت الراوند جات وحده بنت سألتني : انت ميديكال استيودنت .... والله كنت حسجد , اول مره  يجي احد  يسألني في الدي المستشفى عن هويتي , وما يقولي انت انترن ؟؟؟!!!
قلتلها ايوا .. ابتسمت برضا وسكتت .. استغربت طب ايش تبغي!!  بس حسيت انها ستيودنت برضو .. وتبى تطمن انو في احد زيها يتمتع .. بالمتعه المقدسه عند كل طالب طب ..
ترابد : وانت ؟
البنت ( اسمها عبير ) : ايوا سنه خامس ..
انا وقلبي يرقص طربا : اه انا سنه رابعه ( في عقلي .. اخيرا احد اكبر مني )
المهم بدأنا الراوند .. اول كيس ستروك .. ما سأل الدكتور شي .. والحمد لله انه لم يفعل لاني ما افهم فيها حاجه ..
بعدين سأل في بيشنت دايبتك : ايش الكومن انفكشن عندهم جرام نجتيف ولا بوسيتف ؟؟ .... اممم ما حعزبكم دي المره وحجاوب على طول .. جرام نيجتيف .. وايش الاورجانيزم ؟؟ سودوموناس (:
احلى شي انو الدكتور فاكر كل الاسئله الي سألني هيا خلال الايام الي فاتت .. ويرجع يعيده للبنت الجديده عبير ,, ولمن ما تعرف تجاوب .. احم احم تتقدم ترابد للمساعده وطبعا مبسوطه وانا اجاوب ..
سأل في مريض عنده اتريال فيبريلايشن متى اعطي وارفيرين ومتى اعطيه اسبرين ؟؟
في حاجه اسمها تشادز سكور , CHADS, سي معناته كونجيستيف هارت فالير , اتش فور هايبر تينشن , A فور50 < age , دي فور ديابيتك , اس فور ستروك , كل وحده  ب ون بوينت ما عدا الستروك  ب تو بوينت , اذا كان المريض عنده تو بوينت  او اكتر اعطي وارفارين , اذا ون بوينت اعطي اسبرين ..
بعدين وقفنا كده عند مريض بيد ريدن .. سأل الدكتور : زي كده مريض ايش انواع الانفكشن الي معرض ليها ؟؟ فجأه تننحنا كلنا سرنا نفكر في اورجانيزمز ... فجأه السبيشلست ( ما حكيتكم عنه ) زعق هاي واتس رونج ويذ يو تو داي .. اتس نوت افتر نون يات .. وايك اب !!!!!! فجأه نحنا الاربعه كأنه احد اعطانا كف .. انفرطنا كل وحده تقول شي .. يو تي اي .. اسبايريشن نومونيا .. مانينجايتس .. بيد السرز .. طالع فينا السبيشلست ,أبتسم : والموست كومن ؟؟؟ بصوت واحد يو تي اي (:
دخلنا على مريضة بان سايتو بينيا ( ودي المريضه هيا الي جا منها موضوع البريزين تايشن ) .. سأل الدكتور : اذا كان عنده تي بي ايش ممكن نشوف في البون مارو بايوبسي حقها ؟؟؟ .. طبعا ما عرفنا .. كازياتنينج جرانيولوماز ..
رحنا عند مريضه هارت فالير .. بدأ الدكتور يسأل عن الفلويد والهايبو نايتريميا..... . بعدين فجأه قال وعندنا هنا بروفيسوره في الهايبو نايتريميا وأشر عليا ...والله  لو مو عيب كان قعدت انط نط من الفرح .....طالع فيا بما معناه لا تجاوبي  ...  ( للناس الي ما قريت البوستات الي فاتت .. قدمت الهايبو نايتريميا في الايام الي راحت ) .. البنات حاولو وحاولو .. وانا مستنيه يقولي جاوبي ... لمن خلاص مافي امل .. طالع فيا ( وانا طبعا في قمة الحماس ) .. يس ترابد  .. وطبعا انفرطت .. شرحت الهايبو نايتريميا في دقيقتين بكل الارقام واحلى حاجه لمن اجاوب بأرقام احس نفسي كونسالتنت .. واول لمن كنت بحضرها للتقديم , اخدت مني مجهود تلاته ايام ( وما كنت  متخيله يوم من الايام اني حفهمها )..
فجأه الدكتور سأل مين حيقدم اليوم .. تطوعت بالإجابه .. رهف و ريما .. هايبو وهايبر كاليميا .. الدكتور : اه جود  ,  وات اباوت بان سايتو بينيا ... قلتلو تمورو دكتور وابتسامه عريضه  ... الدكتور: اه انشاء الله <<<<<< الله يسعدك يادكتور ..
بعدين الريزيدنت قالت مين لغى البانسايتو بينيا .. قلتلها انا ... طالعت فيا كده .. طب ليه ؟؟ .. ترابد .. معليه يا دكتوره عشان الهايبو والهايبر وماحيكفي الوقت .. الريزيدنت : اها .. ترابد بعيد عن مسامع الريزيدنت  : اه الحمد لله نجوت ..
في البريك .. جلسنا في الاونكول روم وكان معانا بنتين  جداد سنه  خامسه طالعين سادسه ,  الي معايا عبير ووحده تانيه في تيم تاني .. قعدو يحكونا عن سنه خامس والاعاصير الي واجهتهم .. وقعدو ينصحونا ويحكونا عن مغامراتهم مع دكاترة المدسن ,,,, البنات مررره لطيفات وشطار ماشاء الله ..
الحمد لله قدمت رهف الهايبو , وريما  الهايبر , والدكتور كان معجب بيهم والحمد لله ...
الحمد لله كان يوم ناجح وجميل ..
ملاحظه 1 : I MISS THE WORLD CUP SO MUCH ):
ملاحظه 1ونص : العنوان << ترى بمزح ... مافي اي قتال بس مني لاقيه عنوان (:
ملا حظه 2  : للناس الي في الختمه اليوم الجزء الخامس بإذن الله .. والي ما بدؤوا .. ترى لسه في وقت .. شدو الهمه وربنا يسهل ..
.. سبحانك اللهم وبحمدك اشهد ان لا اله الا انت استغفرك واتوب اليك ..