اول يوم تدريب في مستشفى الملك فهد العسكري للقوات المسلحه (:

طيب كتير ناس حتقول مجنونه اخدتي تدريب دحين ايش دا مره بدري , خدي اجازه , انبسطي شويه حرام عليك , وكل دا الكلام الفارغ .. للاسف كل منا ظروفه وامكاناته سو نو جدجينج هير, اسمعو الي حصل وانبسطو وبطلو اللقافه في حياة الناس,  كل واحد يسوي الي يبغاه .. طبعا الكلام موجه للمعارضين فقط (×

الساعه 5 ونص ... لا لا لا  لا لا تخرجوني .. بسم الله الرحمن الرحيم .. الحمد لله كان حلم .. حلمت اني بلعب كوره وكانو حيطرودوني من الفريق عشاني ما اعرف العب كنت البنت الوحيده  في الفريق !!!

صليت الفجر ودعيت انو ربنا يعد ي دا اليوم على خير .. جلست على السرير افكر في .. ورقة الافثالمو .. التيم الجديد حكون مع اولاد ولا بنات ؟؟ , متعاونين ولا دمهم تقيل , الدكتور طيب ولا شرير ...مفيد ولا حيضيع وقتنا , المانيا حتفوز ولا لا.. كمية الشماته الي حيتشمتوها الناس فيا لو خسرت .... ونمت .. الا فجأه الساعه سبعه وربع .. يا ويلي اتأخرت.. لبست بسرعه ودخلت في الاب كوت و الجزمه البيضه , شنطتي حأخد كبيره ولا صغيره اخد دفتر كبير ولا صغير . لو كبير حتعب وانا شايلتو في الراوند ولو صغير ما يكفي المعلومات العظيمه الي حكتبها  , في الاخير استقريت على الدفتر الصغير لأنو يدخل في جيب الاب كوت .. قهوتي جاهزه .. ورقة الافثالمو في الشنطه  ,الورقه  اهم شي انسى نفسي ولا انساها .. وانطلقت بسم الله على بركة الله ..

خبر جميل .. في السياره الليدر اتصلت وقالتلي انها ما سلمت كل اوراق الجروب مو بس انا يعني بس اعطيها الورقه وهيا تتكفل بالباقي .. كنت ابى اسجد سجود شكر في السياره بس للاسف ما في مساحه .. الحمد لله اليوم بدأ يبشر بالخير

وصلت المستشفى .. جميله المباني واحد قديم وواحد جديد وبينهم جسر من قزاز .. رحت مكتب التسجيل .. اعطوني الجدول .. طيب القصه تقول لمن تسجل لازم ترجع تراجع ايش اعطوك قسم و حطوك في اية فتره .. بس طبعا مارحت ..

فلمن دخلت سرت اطالع في الجدول الي معلق على لوحة الاعلانات خايفه يكونو ما حطوني مدسن .. اطالع في الورقه كاني اطالع في ورقة الدرجات .. الحمد لله حطوني مدسن .. سألت مدير التسجيل
ترابد : لو سمحت انا طالبه وجايه ادرب فين اروح (: وطبعا ابتسامه كبيره على وجهي عشان لا انطرد ( لانه على ما اعتقد كلمة  ستيودنت دي تخلي الناس إ ريتايتيد )

بدون حتى ما يطالع في وجهي المبتسم

المدير : اسمك ايش ؟

ترابد : ترابد ميديك (:

المدير برضو لسه ماطالع : قسم ايش ؟

ترابد : باطنه .. برضو ببتسم .

المدير: طيب ليه جايه هنا ؟؟

راحت ابتسامتي : عشان اشوف  الجدول و اية قسم حطيتوني !!

المدير برضو ما طالع : طيب روحي قسم المدسن .

ترابد : طيب لو سمحت ما في اي دي ولا حاجه ؟؟!!

المدير.. طالع وابتسم نص ابتسامه : روحي المدسن  ما في أي دي.

حسيت كأنه بيقول .. بالله عليك انت زي كده مفعوصه تبغي أي دي في مستشفتنا المحترمه , يعني بالله حتنقذي مين !!! حسيت بالاهانه .. مع إنه الكلام كله كان في راسي بس حسيت كأني سمعته ..ما اعرف متى حيكون للطلبه الغلابه بعض من الاحترام .. كل ما تروحي قسم تنطردي ولا احلى حاجه في مستشفى الجامعه لمن يقولو ستيودنت نوت اللاود .. اجل متى اللاود لمن اعجز واسير كونسالتنت !!!!

المهم .. بدأت اشق طريقي بحثا عن قسم المدسن .. والله من كتر ما سألت حسيت نفسي سائح بيدور على متحف .. بعد طلوع ونزول ودوخه في الاصنصيرات .. وصلت بحمد الله لقسم الباطنه .. هدوء .. الغرف مقفله  والمرضى نايمين .. مافي الا كم نيرس وعمال النظافه بيمسحو الارض .. طيب بدأت اطالع يمين يسار .. المهم بعد اسئله واجوبه من النيرسيز نصها غلط ومهي مفهومه .. وبعد نص ساعه من ايوا لا ويتخللها  الكثير من كلمة ستيودنت ... توصلت انو قسم الباطنه عندهم سكرتيره عند الاصانصير ..رحت , دخلت , وقفت 10 دقايق لمن الناس خرجت , السكيرتيره اعطتني وجه .. اخدت بياناتي .. قالتلي تبغي قسم ايش .. استغربت وخفت ايش بها دي خلاص انا مدسن لحد يغيرني ..قلتلها مدسن .. طالعت فيه بنظره ( يا غبيه ) ايوا مدسن قسم ايش .. جاسترو , بلمونري , نيورو .. هزيت راسي لا لا ابى مدسن .. بحلقت فيا الحرمه شويه وبعدين قالت اها تبغي انتيرنال مدسن .. اتسعت ابتسامتي وهزيت راسي فوق تحت ..ايوا (عليك نور) انتيرنال مدسن ..شويه الا انفتح الباب ودخلو ولد وبنت .. طالعت في البنت بنظره فاحصه وانا ادعو الله اني اكون اعرفها .. ايوا اعرفها الحمد لله .. حيكون في احد معايا نقدر نتناقش في الكيسيز سوا ونروح الكفتيريا سوا .. ما حكون لوحدي   أنسإل وما اجاوب واتفشل ,, الله في احد حيشاركني هذه المتعه المقدسه ..

ترابد وانا اصافحها : كيف حالك ؟ ... وبدأ الحوار وانتهى كأي حوار عادي ..

طيب نجي للولد .. طويل مره , نحيف مره , مو اسمر مره , طالعت فيه وانا بفكر ... امممم قدي ولا مو قدي .. لو قدي جميل يسير مستوى المعلومات زي بعض  , ما في احد حيتفشل قدام التاني , لو اكبر يعني لازم استغله واستفيد منه .. اممم فكره جميله .. اخلي يشرحلي كل شيء مني فاهمته .. اممم انا عبقريه (:

بدأت السكرتيره تاخد معلومات البنت .. خلصت البنت .. السكرتيره ما سألت الولد .. جلس واقف يطالع في ملف في يده مقفل .. خلصنا نحنا البنات ووقعنا واخترنا دكاترتنا وكل شي وهوا لسه واقف سرحان وما سوا ولا شي حتى بياناته ما كتبها .. قلت امكن الولد مكسوف عشان نحنا واقفين قدام المكتب ومافي مساحه يمد يده ياخد دفتر البيانات .. سويت خير واعطيته الدفتر .. كتب ورجعه .. ورجع سرح تاني .. قلت ايش به دا .. المفروض يختار مع أي دكتور يبى يكون ..

قلت اكيد دا  اصغر مننا .. مو عارف ايش يسوي .. رحت جبت ورقة اسامي الدكاتره وقلتلو اختار اية قسم تبغى .. اخد الورقه طبعا بدون شكرا .. ورجع اعطاها للسيكرتيره .. (في الدفتر الازرق لمحت اسم البنت والولد طبعا من دواعي اللقافه وتحسين العلاقات) .. البنت بسمه والولد سمير .. المهم السيكرتيره سألتو ايش تبى قسم قلها انتيرنال مدسن .. قالتلو اسمك ايمان قلها ايوا .. طبعا انا عيني انفتحت على مصرعيها .. بس قلت ما حتكلم شكلي شفت الاسم غلط المهم .. راحت تكلم الدكاتره  يجو ياخدونا .. رحت بسرعه فتحت الدفتر الازرق وسويت نفسي بتأكد من بياناتي .. طبعا كنت بطالع في اسم الولد .. وطبعا  طلع سمير مو ايمان .. لمن رجعت السكيرتيره .. طالعت في الولد لعله ينتبه للخطأ بس طبعا كان سرحان .. قلت خلاص انا حتكلم اخد اجر في ..

اسكيوز مي .. هيز نايم نوت ايمان هيز نايم إز سمير .. طبعا لمن قلت اسمه خرج من سرحانه .. وقال انا سمير سمير ..

بس ياشيخ !!!!

اتوزعنا على الدكاتره .. وحطو كل واحد مننا في تيم >>>>  الحمد لله (: البنت طلعت بغيضه ,وتجيب المرض << انشاء الله بس ما تقرا دا البوست (×

والولد طلع سنه سادسه !!!!!!!!!!!!!!! الرحمه كيف حستفيد منه دا ؟؟

الريزيدنت وما ادراك ما الريزيدنت .. نحيفه , قصيره , صوتها واطي , بوست كول ونعسانه << يعني بالعربي مهي فايقالي.........

طيب مرره دحين تعبانه  و كده كفايه عليكم ..لكن اتجهزو للمعلومات المفيده والاحداث المشوقه في الجزء التاني من يومي الاول .. ايوا كمان في راير كايس حتكلم عنها في الجزء التاني( تخيلو راير كايس في اول يوم دوام اللهم لا حسد) جهزوا كتب المدسن وكتب الديفرينشيال دايقنوسيز .. عشان تساعدوني.. الكونسالتنت  اعطاني عشره مواضيع اقرى فيها ولغاية دحين ما فتحت شي ,لا واخر الدوام إيش يقولي , ريد سم ارتيكالز ترابد  إن إفدنس بايسد مدسن !!!!!!!!!!!!!!!