مذكرات رمضانيه (:

كان دعاء رائعا .. احسست انه غسل اعيننا وقلوبنا من كل شي كان متعبها ,, في تاني يوم رمضان .. الله يا رمضان بس في تاني يوم اعدت الينا احساس الصفاء و الرحمه ... وازلت ارهاق سنه كامله ... ابدع الشيخ خالد الكافي في دعاء هذه اليله .. تاني ليله من رمضان .. تقبل الله منا ومنكم صالح الاعمال .

بعد ما عدلت الطرحه وانا خارجه من المسجد انفتح الباب .. الا قدامي حريم كتير متكومين وكلهم حاطين الطرح على فمهم وعيونهم .. قلت بسم الله ايش في .. الا ولد قدامي قاعد يفرك عيونه بقوه .. قلت ايش بو دا حيخلعها .. الا اخرج من الباب .. وريح كلها تراب تهب في وجهي .. بسرعه تراجعت ودخلت المسجد تاني .. بس خلاص قيدو التراب دخل .. حاولت امسح .. يا ويلي دحين كيف اخرج و السياره بعيده .. 

فكرت فكرت .. والحريم طبعا هرج وزعيق والطرح طايره والعبايات منفوشه .. يا الله ايش الموقف دا .. خطرت لي فكره .. فتحت الشنطه ادور يارب في يا رب في يا رب .. لقيتها نظارتي الشمسيه العزيزه .. 

لبستها وخرجت .. طبعا كل الناس تطالع .. وانا مبسوطه .. الوحيده الي مني حاطه الطرحه على عيني .. حتى الرجال نزلو اشمغتهم وكوفياتهم وحطوها على وجههم ..  

في السياره وفي الطريق الى المنزل .. الريح اشتدت لدرجة اني مني شايفه السيارات الي جمبي .. 

المهم قلت الله يستر بس ارجع البيت بالسلامه .. قلت للسواق يمشي بشويش خلينا في ساعة خير (:

والا شويه تروح كل الغبره .. وينزل مطر ... يا الله .......am in love with ramadan 

                                                                       سبحان الله     RAIN

 قال رسول الله –صلى الله عليه وسلم-:"ثنتان لا تردان:الدعاء عند النداء أو عند البأس حين يلحم بعضهم بعضاًوتحت المطر"

رمضان وتراويح ومطر .. LUCKY ME (:

طيب ندمت اني بدأت عالم صوفي دحين .... مو عشان الروايه مو حلوه او شي .. لا بالعكس جدا مشوقه ومن زمان كان نفسي اقرا عن طاليس وسقراط واخوانهم ... لكن مررررررررره مو وقتو .. يتفلسفو على راسي دحين .. يسألو اسئله اجوبتها بديهيه بالنسبه لي .. مساكين .. 

كل يوم بعد الفطور .. يعني امس واليوم هما كلهم يومين .. المهم .. اجلس اقرا في عالم صوفي لغاية قبل التراويح بنص ساعه .. المشكله اني لمن اروح اصلي .. طاليس وسقراط لسه في عقلي (: 

فقررت اني ما حوقف الروايه لكن .. ما حقراها قبل التراويح كده افضل ..

 خلصت اول شابتر .. يتكلم عن فلاسفة الطبيعه الي هما :

1/ طاليس 

2/ اناكسيماندر

3/ اناكسيمانس 

4/ بارمينيدس 

كلهم يتكلمو عن اصل الطبيعه .. والماده , الذره , الاكترونات والبروتونات ويضاربو طبعا .. ماعدا ديمقريطس.. الي جا حل دي المشكله وفي دا المقطع من الروايه : 

اليوم. نستطيع ان نؤكد ان نظرية ديمقريطس حول الذره كانت صحيحه . فالطبيعه مكونه , حقا , من ذرات مختلفه , تتجمع وتتفكك , وربما تكون ذرة الهيدروجين , موجوده في طرف انفي الان , قد شكلت جزءا من خرطوم فيل ما ,

 في يوم من الايام << ما اعرف اذا دا كلام صحيح او لا .. الي اعرفه انو الكلام دا مو وقته رمضان (×

غير الاسئله الي على شاكلة .. 

هل تؤمنين بالقدر ؟؟ << الفيلسوف يسأل صوفي 

هل المرض هو عقاب من الله ؟؟ << مسكين ما يعرف انو المرض ممكن يكون رحمه من الله بعبده عشان يخفف ذنوبه , او ابتلاء من الله عشان يرفع بيها درجات العبد في الجنه , او حتى اختبار لصبر العبد ومعرفة مقدار حبه و رضاه بالله ..

اي قوى تحكم مسيرة التاريخ ؟؟ << الله طبعا .. بس الزمن او التاريخ لا يجري على الله لانه هوا خالق الزمن .. والمخلوق لا يحكم الخالق .. 

المهم الكتاب رائع بس وقته مو دحين او بالاصح مو قبل التراويح .. فقررت اني اختار كتاب تاني .. من مجموعتي الجميله .. ووقع الاختيار على الدكتورجيفري لانغ .. عالم الرياضيات في كتابه Struggle to surrender , او الصراع من اجل الايمان, انطباعات امريكي اعتنق الاسلام << شكلو يحمس 

معليه ما لقيت صورة الكتاب المترجم .. 

و اخيرا استمتعوا بالسمبوسه والتراويح .. رمضان كريم (: